Saturday, 16 November 2013

ආදරය







                                                             බටහිර අහසේ කෙමෙන් කෙමන් හිරු සැඟවී යන්නාත් සමඟම සැඳෑ අඳුර කවුළු දොරින් බෝඩිම් කාමරය තුළට ඇතුළු වන්නට විය. පෙරළමින් සිටි පොතෙහි අකුරු අපැහැදිලි වූ නිසාදෝ විදුලි පහන දැල්වීමට මට සිත් දුනි. නමුත් බිත්තිය ළඟට යෑමට තිබූ කම්මැලිකම නිසාදෝ අඳුරේම තව ටික වේලාවක් සිටීම සුදුසුයැයි මට සිතුණි. කියවමින් සිටි පොත පැත්තකට දැමූ මා කවුළුව වසා දමා ඇඳ උඩට ගොඩ උනෙමි.
                                                             ඇඳ උඩට ගොඩ වූ මාගේ සිතට නොයෙකුත් සිතුවිලි ගලාගෙන එන්නට විය. ඒ සියල්ලම යටපත් කරගෙන හදවතට දැනුනු අමුතුම හැඟීම පාළුව හෝ තනිකම විය යුතුයැයි මට සිතුණි. හුදකලාව , විරහව , සංවේගය මේ සියල්ලම එකම දම්වැලක පුරුක් වැනියැයි මට සිතේ. මේ සිතුවිලි අතරේම ඇසට ගොම්මන් අඳුරද හුරු වූ විට තවත් අමුතුම ආකාරයේ සංවේදනයක් හදවතට දැනෙයි. බෝඩිම් කාමරයේ බිත්ති හතරට සිරවී සිටින මට පාළුව තනිකම මැකීමට කෙනෙක් සිටියානම් හොඳයැයි අනන්තවත් සිතී ඇත. එසේනම් මට ඇය සමඟ දවස පුරාම sms කර කර සිටිය හැකිවනු ඇත. අනිත් අය මෙන් නිතර නිතර ඇය සමඟ කථා කිරීමට හැකිවනු ඇත. ඇත්තටම එවිට පාළුවක් නොදැනෙනු ඇත.
                                                             ඇත්තටම මේ කියන තරම් ආදරය සුන්දරද ? නැතිනම් මේ සියල්ලම මවාපෑමක් පමණක්ද? ආදරය මෙතරම් සුන්දරනම් ලොව මේ තරම් විරහ ගීත බිහිනොවනු ඇත. හැම ආදර කථාවකම අවසානය කඳුළක්ද? නැතහොත් සිනහවක්ද? විවිධාකාර වූ ප්‍රශ්න මගේ හිතට ගලා එන්නට විය. ගඟක ගැඹුර කිසි දිනක ගොඩ සිට නිමානය කල නොහැකිය. ඒ සඳහා ගඟට බැස බැලිය යුතුමය. ගංඟාවක් මතුපිට ඇති සම ජල ස්කන්ධයක් සේ අපට දර්ශනය වුවද එය පතුලේ බොහෝ ගල්පර ,ආවාට , ආගාධ සැඟවී තිබිය හැක. ආදරයද එලෙසම විය යුතුය.
                                                               ඉතින් ආදරය කරන්නේ කෙලෙසද? ඒ සඳහා ප්‍රථමයෙනම ආදරය කිරීමට කෙනෙක් තෝරාගත යුතුය. ඒ කෙලෙසද ? අපේ ඇඟ තුළ හදවත හා මොළය ඇතුලට වන්නට පිහිටා ඇති නිසාදෝ හැම දේකටම ඉස්සර වන්නේ ඇසයි. එනිසා ගැහණියකගේ වුවද මුලින්ම අප සිත ඇදී යන්නේ ඇයගේ රූපයටයි. ආදරය කිරීමටනම් ගැහැනියක් ලස්සන විය යුතුමද ? මම එසේ නොසිතමි. එදිනෙදා ජීවිතයේ පාරතොටේදී අපට බොහෝමයක් ගැහැනුන් මුනගැසෙයි. නමුත් රත්‍රී නින්දට යන මොහොත වනවිට මේ සියල්ලම අපේ මතකයට නගාගතහැකිවේද? මටනම් නොහැකිය. ඇත්තටම කෙනෙක් ගැන මතකයක් අප සිතේ රැඳීමටනම් යම්කිසි විශේෂයක් ඔහු හෝ ඇය තුළ තිබිය යුතුය. එය කෙනෙකුගේ දුර්වලතාවයක් , දස්කමක් නැතහොත් ඔහුගේ ගොන් වැඩක් විය හැකිය. නැත්නම් ඔහු හෝ ඇය කෙරෙහි පෙර ආත්මයක බැඳීමක් තිබිය යුතුය.
                                                             නමුත් මේ සියල්ලකටම අප යම් කෙනෙකු දිහා බොහෝ වේලා අධ්‍යයනය කළ යුතුය. නමුත් ගැහැණියකගේ මේ සියල්ලටම වඩා අප මතකයෙහි රැඳීමට හේතුවන කාරණයක් ඇත එනම් ඇයගේ ලස්සනයි. ගැහැනියක් ලස්සන වෙයි නම් අපට බොහෝ කාලයක් ඇයව මතක සිටියි. නමුත් ගැහැනියක් සුන්දර වන්නේ මතුපිටින් පෙනෙන ලස්සන නිසාම පමණද?
                                                        එය එසේ විය නොහැකිය , ගැහැනියක් ලස්සන වන්නේ බාහිරින් පමණක් නොවෙයි ඇය හදවතින්ද ලස්සන ගැහැනියක් විය යුතුය. ගැහනියක් කෙතරම් ලස්සන වුවත් ඇය අකාරුණිකනම් , ආත්මාර්ථකාමීනම් ඇය සමඟ ජීවත් විය හැකිද? බාහිර ලස්සන වූ කලී හුදෙක් තාවකාලික දෙයක් පමණ්කි. එය අවුරුදු දහයකටත් වඩා අඩු කුඩා කාලයකට සීමා වන්නකි. අන් සියල්ලම මෙන්ම බාහිර ලස්සනද වෙනස්වෙයි ලස්සන අවලස්සන වීමට ගතවන්නේ ඉතා කුඩා කාලයකි.නමුත් අභ්‍යන්තර ලස්සන සදාකාලිකවෙයි. එය අපගේ ජීවිත කාලය පුරාම පවතින අතර කිසිදිනකත් මහළු නොවෙයි.
                                                           නමුත් බාහිර මෙන්ම අභ්‍යන්තර ලස්සනින්ද හෙබි ගැහැනුන්  අද සමාජයේ සිටීද? සිටිනවා ඇත නමුත් සෙවීම ඉතා අපහසුය. මන්දයත් අභ්‍යන්තර ලස්සන අපට මතුපිටින් බලා තීරණ්ය කළ නොහැකි වීමයි. සමහරවිට කෙනෙකු හඳුනාගැනීමට මුළු ජීවිත කාළයම වැයවනු ඇත. අද සමාජය වාණිජකරණයට ලක් වූ එකකි. හැමදේම මෙන්ම ආදරයද මුදලට විකිණී ඇත. ටොෆි , චොක්ලට් , මාල , මුදු ආදරය වී ඇත. අද බොහෝ තරුණියන් ආදරය මනින්නේ මේවාගෙනි. නමුත ආදරය කිසිදිනල මුදල් වලින් මැනිය නොහැකියැයි මට සිතේ.
                                                          ආදරය කිරීමත් හිතපු තරම් ලේසි නැත. ආදරය කිරීම නම් කෙසේ හෝ කළ හැකිය ටොෆි  , චොකලට්ද මිලදීගතහැකිය නමුත් ආදරය කිරීමට හොද කෙල්ලෙක් සොයාගන්නේ කෙසේද? එය ඉතාමත් අපහසු කාර්යකි. හොඳයි කෙසේ හෝ හොඳ කෙල්ලෙක් සොයාගත්තායැයි සිතමු ඇය මට කැමති වේද? තවත් ප්‍රශ්නයකි. "අම්මෝ ආදරය කරන එකත් මහ පණ යන වැඩක්නෙ" විටෙක මට සිතේ. "මචං මොකද කළුවරේ උඹ නිදිද?" නොදැනීම බොහෝ වේලා ගතවී ඇත. "අහ්හ් ආ නෑ නෑ බන්   ඔන්න ඔය ලයිට් එක දාපන්"





Reactions:

8 comments:

  1. Ela .................................! grate creation.

    ReplyDelete
  2. ආදරය සමහර අවස්ථාවන්හිදී තවකෙකුගේ හැගීම් සමග කරනා ක්‍රීඩාවක් ලෙසද කිව හැක. එහිදී දෙදෙනාම දිනන්නටද පුලුවන, පරදින්නටද පුලුවන, එක් අයකු පරදින්නටත් ඒ නිසාම ජීවිත කාලය පුරා විදවන්නටත් පුලුවන...
    "ආදරයේ උණුසුම ලග දුක දැනෙන්නෙ නෑ.. දුක් කරදර නැති දවසට දුර පෙනෙන්නෙ නෑ.."

    ReplyDelete
    Replies
    1. ඇත්ත තමයි , ජීවිතේ ලණුවක්....... ආදරේ එහි සොඳුරුතම ගැටයක්..................

      Delete
  3. superbb brother,,,well done..well said machan..

    ReplyDelete